Tensionet mes Shteteve të Bashkuara dhe Iranit janë përshkallëzuar pas kërcënimeve të presidentit amerikan Donald Trump për sulme ndaj infrastrukturës iraniane, nëse Teherani vijon të godasë anijet tregtare në Ngushticën e Hormuzit.
Në një postim në rrjetin Truth Social, Trump deklaroi se çdo sulm iranian ndaj një anijeje në këtë zonë strategjike do të pasohet nga një goditje amerikane ndaj një ure ose një termocentrali në Iran.
“Sa herë që Republika Islamike e Iranit qëllon ndaj një anijeje në Ngushticën e Hormuzit, Shtetet e Bashkuara do të bombardojnë dhe do të shkatërrojnë një urë ose një termocentral”, shkroi Trump.
Kërcënimi vjen në një kohë kur tensionet janë rritur edhe në Detin e Kuq, pasi rebelët huthi në Jemen, të mbështetur nga Irani, kanë paralajmëruar sulme ndaj rrugëve të transportit të naftës. Disa cisterna nafte kanë ndryshuar kurs për të shmangur Ngushticën Bab el-Mandeb.
Nga ana tjetër, një zyrtar i lartë iranian, kryetari i Parlamentit Mohammad Baqer Qalibaf, paralajmëroi se “asnjë infrastrukturë nuk do të jetë e sigurt” nëse Shtetet e Bashkuara godasin objektet iraniane.
“Siguria jonë duhet të garantohet, përndryshe asnjë infrastrukturë nuk do të jetë e sigurt”, shkroi ai në rrjetin X, duke shtuar se situata në Ngushticën e Hormuzit nuk do të kthehet në gjendjen e mëparshme.
Përshkallëzimi i konfliktit ka ndikuar edhe në tregjet energjetike. Rreziku për transportin detar në Gjirin Persik dhe Detin e Kuq ka shtyrë çmimet e naftës drejt niveleve më të larta të javëve të fundit, ndërsa kompanitë po kërkojnë rrugë alternative për transportin e karburanteve.
Ndërkohë, përleshjet ushtarake vijojnë. Sipas raportimeve, sulmet amerikane ndaj Iranit janë zgjeruar në disa zona të vendit, ndërsa Teherani ka goditur objekte energjetike dhe baza ku ndodhen forca amerikane në rajon.
Sekretari amerikan i Shtetit, Marco Rubio, deklaroi se Irani nuk ka qenë serioz në negociata dhe paralajmëroi se Uashingtoni do të marrë masat e nevojshme për mbrojtjen e interesave të tij dhe të aleatëve.
“Nëse ata janë seriozë, edhe ne jemi seriozë. Nëse nuk janë, atëherë do të bëjmë atë që është e nevojshme”, tha Rubio gjatë një takimi në Manila.