Një moment i pazakontë ndodhi të martën në Suedi, vetëm pak minuta pas prezantimit zyrtar të ministres së re të Shëndetësisë, Elisabeth Lann.
Gjatë një konference për shtyp në prani të kryeministrit Ulf Kristersson dhe anëtarëve të kabinetit, Lann humbi ndjenjat dhe u rrëzua, duke goditur kokën në podium. Pamjet e incidentit u përhapën shpejt në mediat suedeze, ndërsa të pranishmit mbetën të tronditur.
Sipas Prokurorisë së Posaçme të Suedisë, rojet e sigurisë ndërhynë menjëherë, ndërsa kryetarja e Partisë Demokristiane, Ebba Busch, dhe disa anëtarë të kabinetit nxituan për ta ndihmuar.
Pas disa minutash tensioni, ministrja u shoqërua jashtë sallës dhe konferenca u anulua. Një gazetar në vendngjarje deklaroi: “Gjendja duket shumë serioze. Ra pikërisht para meje.”
JUST IN: Swedish Health Minister Elisabet Lann collapses at press conference pic.twitter.com/zhviF4kCYQ
— BNO News Live (@BNODesk) September 9, 2025
Më vonë, Lann u kthye në sallë e buzëqeshur, duke qetësuar të pranishmit. Ajo shpjegoi: “Nuk ishte një e martë normale, por kjo mund të ndodhë kur ke sheqer të ulët në gjak.” Edhe pse nuk u raportuan lëndime serioze, nuk dihet nëse ministrja ka kërkuar trajtim të mëtejshëm mjekësor.
Elisabeth Lann, anëtare e Partisë Demokristiane, më parë ka shërbyer si këshilltare bashkiake në Göteborg. Ajo mori postin e ministres së Shëndetësisë të martën, pas dorëheqjes së papritur të ish-ministres Ako Ankarberg Johansson një ditë më parë.