Një incident i frikshëm ka ndodhur gjatë etapës së parë të Giro d’Italia, e cila këtë vit nisi në Shqipëri. Çiklisti spanjoll Mikel Landa ka pësuar një përplasje të rëndë në një kthesë në zonën e Freskut, vetëm pak kilometra para përfundimit të itinerarit mes Durrësit dhe Tiranës.
Landa humbi kontrollin në një zbritje dhe përfundoi jashtë traseut, duke marrë dëmtime të konsiderueshme. Menjëherë pas rrëzimit, ai mori ndihmën e parë nga stafi mjekësor i garës dhe u transportua me urgjencë drejt spitalit me barelë.
Gjendja e tij shëndetësore ka ngritur pikëpyetje mbi mundësinë e rikthimit të tij në garë, ndërsa ekipi i tij pritet të japë një njoftim zyrtar mbi vijimin ose jo të pjesëmarrjes së tij në etapat e tjera të Giro-s.
Ndërkohë, fitoren e kësaj etape 160 kilometërshe e rrëmbeu çiklisti danez Mads Pedersen, duke lënë pas rivalin belg Van Aert dhe çiklistin Aular që zuri vendin e tretë.
Incidenti me Landa-n ka hedhur një hije të rëndë mbi nisjen e këtij eventi prestigjioz çiklistik, që për herë të parë zhvillon etapa edhe në territorin shqiptar.
Mikel Landa abandona en camilla tras su dura caída.#Giroditalia pic.twitter.com/z9Prb3XzXa
— Eurosport.es (@Eurosport_ES) May 9, 2025