Në foto mund të shikoni makinën që përplasi për vdekje avokatin Leonard Dingo në orët e para të datës 21 gusht.
Dy ditë më vonë policia zbuloi se autor i këtij krimi ishte 22-vjeçari Erjon Kacani.
Kacani ka qenë duke lëvizur në rrugën dytësore “Plepa-Kavajë” dhe për shkak të shpejtësisë tej normave të caktuara ka përplasur për vdekje avokatin Dingo që në ato çaste po kalonte rrugën.
Pas përplasjes, në pamjet e kamerave të sigurisë është fokusuar i riu i cili largohet nga vendngjarja drejt fshatit Kodër Arapaj ku braktisi mjetin dhe zhduket pa gjurmë.
Gjatë ditës së djeshme kanë reaguar mbi këtë ngjarje tragjike kolegët e avokatit Dingo, të cilët shpreheshin se kjo është një vrasje e qëllimshme.
Një tjetër koleg ka reaguar përgjatë ditës së sotme i cili e vlerëson ngjarjen si tentativë vrasjeje.
“Është për të ardhur keq që muajt e fundit kemi vrasje, tentative vrasje të avokatëve. Ngjarja e fundit ku kolegu ynë Leonard Dingo thuhet se ka vdekur në aksident por mekanizmi nuk tregon se kemi të bëjmë me një aksident por vrasje. Nuk jam i sigurt se nuk e njoh dosjen. Aksidenti është diçka që ndodh nga pakujdesia por veprimet post aksidentit na bëjnë të dyshojmë. Avokati merrej me çështje civile dhe këto çështje kur vijnë drejt fundit kanë problematikat e veta sepse çdo marrëveshje me avokatin lidhur me palën bëhet një titull ekzekutiv.’-shprehet Saimir Visha, drejtues i shoqatës së avokatëve penalistë.
Muajt e fundit ka pasur disa ngjarje të rënda që kanë kërcënuar njerëz të drejtësisë si tritoli në Shkodër ndaj shtëpisë së gjyqtarit apo sulmi fizik ndaj avokatit Sokol Mëngjesi që sipas Saimir Vishës kërkojnë një reagim të shpejtë nga autoritetet.