Situata e zjarreve në Gramsh është përkeqësuar ndjeshëm. Kryebashkiaku Besian Ajazi njoftoi se mbi fshatin Sojnik është ndezur një vatër e re, më e madhe dhe më agresive, e cila është përhapur deri në Snosëm, duke rrezikuar banesa.
Sipas tij, flakët dyshohet se janë shkaktuar nga zjarrvënie të qëllimshme, të cilat po kërcënojnë jetën e banorëve dhe pasurinë publike. Në terren po punojnë zjarrfikës, shërbimi pyjor, vullnetarë dhe forcat e Agjencisë Kombëtare të Mbrojtjes Civile, me 20 efektivë dhe dy helikopterë, por terreni i vështirë, temperaturat e larta dhe era po e bëjnë të pamundur neutralizimin e flakëve.
Ajazi dënoi ashpër “aktet barbare” të piromanëve dhe paralajmëroi se autorët do të përballen me ligjin dhe zemërimin e komunitetit.