Një valë e fuqishme të ftohti ka përfshirë Shtetet e Bashkuara, duke sjellë temperatura afër niveleve më të ulëta historike. Mbi 170 milionë amerikanë, nga Bostoni deri në Florida, po përballen me një nga dimrat më të hershëm të viteve të fundit, pasi masa e ajrit polar që vjen nga Kanadaja ka përshkuar vendin nga veriu në jug.
Sipas Qendrës së Parashikimit të Motit të FOX Weather, rënia e temperaturave nisi që të dielën dhe pritet të vazhdojë deri në mesin e javës së ardhshme, duke ndikuar pothuajse të gjitha shtetet kontinentale të SHBA-së. Meteorologët paralajmërojnë se rajonet juglindore mund të përjetojnë temperatura rekordisht të ulëta ndërsa vala e të ftohtit përhapet drejt jugut.
Në Tallahassee, Florida, termometrat mund të zbresin nën zero gradë deri të martën në mëngjes – madje më herët se në Nju Jork – duke shënuar episodin e parë të ngricave në shtetin juglindor këtë vit.
Specialistët shpjegojnë se ky ndryshim i menjëhershëm i motit vjen si pasojë e një çrregullimi të fortë atmosferik që po zbret nga Kanadaja dhe po shkakton rënie të theksuar të temperaturave në të gjithë Amerikën Veriore dhe Qendrore.
Në Dakotën e Veriut, Dakotën e Jugut, Nebraska, Iowa dhe Minesota, banorët u zgjuan të dielën me temperatura njëshifrore dhe erëra të akullta që ulën ndjeshëm ndjesinë termike. Vala shoqërohet edhe me reshje të mëdha dëbore, me trashësi që në disa zona pritet të kalojë 30 centimetra, duke shënuar një nga episodet e para të motit të keq dimëror për këtë sezon.
Duke nisur nga e hëna, të ftohtit pritet të zhvendoset drejt lindjes, duke përfshirë Malet Appalachian. Qytete si Minneapolis, St. Louis, Detroit dhe Pittsburgh do të regjistrojnë temperatura rreth -5°C, ndërsa Atlanta, Dallas dhe Nashville pritet të afrohen me 0°C. Erërat e forta deri në 50 km/orë do të intensifikojnë më tej ndjesinë e të ftohtit ekstrem.