Vivian Jenna Wilson, vajza transgjinore e Elon Musk, reagoi ashpër ndaj raportimeve të New York Post që pretendonin se ajo kishte mbetur pa para dhe jetonte me tre shoqe banese. Në një postim në rrjetin social Threads, Vivian sqaroi se fjalët e saj ishin nxjerrë nga konteksti dhe mohoi kategorikisht të qenit e varfër: “Uhm… jo? Nuk jam? Asnjëherë nuk kam thënë se jam pa para. Për çfarë dreqin bëhet fjalë?”.
21-vjeçarja, e cila kërkoi ndryshimin e emrit dhe gjinisë në vitin 2022, pohoi se jeton në Los Angeles me të ardhurat e saj dhe ndihet mirë: “Nuk jam super e pasur, por kam mjaftueshëm për të jetuar. Jam shumë më e lumtur se shumica e bashkëmoshatarëve të mi”.
Ajo shtoi se jetesa me shoqet është zgjedhje praktike, dhe jo tregues varfërie: “Mund të përballoj ushqimin, kam strehim dhe disa të ardhura të lira. Nuk kam dëshirë të jem super e pasur”.
Vivian ka qenë gjithashtu kritike ndaj babait të saj, Elon Musk, të cilin e ka quajtur “burrë-fëmijë patetik” dhe “baba të munguar”, duke sqaruar se raportet e saj me pjesën tjetër të familjes janë të komplikuara dhe shpesh të pashpjeguara.