Sot, Elisa Spiropali u shfaq në dyert e Pallatit të Brigadave duke zbritur nga një taksi për të marrë pjesë në mbledhjen e grupit të PS. E gjithë përpjekja për një “show” duket se dështoi kur automjeti në fjalë u pengua nga Garda të hynte në oborrin e Pallatit të Brigadave, çka ia vështirësoi Elisës rrugën drejt sallës së mbledhjeve. Në mos ka bërë “autostop” dhe e ka marrë ndonjë koleg socialist për të vijuar pjesën e mbetur të rrugës.
Në përfundim të mbledhjes, në një përpjekje për të zbutur apo sfumuar tensionet e raportuara mes saj dhe Ramës, Spiropali ka shpërndarë “detaje” të fabrikuara nga mbledhja, të cilat mesa duket synonin të zhvendosnin vëmendjen nga thelbi i asaj që ndodhi sot mes socialistëve.
Ndër frazat që qarkulluan ishte edhe pretendimi se Spiropali i ishte drejtuar Belinda Balluku me termin “ajo”, një detaj që u amplifikua në diskutimin publik. Kjo lëvizje duket si një përpjekje për të shmangur fokusin nga përmbajtja reale e kritikave apo përplasjes me Ramën, duke orientuar debatin drejt elementeve dytësore, që mesa duket as kanë ndodhur si episod, për aq kohë sa konfirmohen vetëm nga mediat pranë Elisës.
Nuk është hera e parë që narrativa rreth ngjarjeve, ku në qendër është Elisa Spiropali, pëson deformime apo riformësime. Duket sikur ekziston një strategji komunikimi që funksionon deri diku mirë në menaxhimin e perceptimit publik, megjithëse reagimet e saj shpesh e tradhtojnë. Ndoshta për shkak të temperamentit apo nxitimit për t’u shfaqur si heroinë brenda PS-së.