Doktori Salvador Plasencia, një nga personat kyç në hetimin mbi vdekjen tragjike të aktorit Matthew Perry, është deklaruar fajtor për shpërndarje të paligjshme të ketaminës, një substancë e fuqishme narkotike.
Plasencia, i cili nuk është identifikuar si personi që i dha aktorit dozën vdekjeprurëse, u vetëdeklarua fajtor në një gjykatë të Los Angeles për katër akuza të rënda dhe tani rrezikon deri në 10 vjet burg. Ai ka pranuar gjithashtu të dorëzojë përfundimisht licencën e tij mjekësore.
Sipas aktakuzës, mjeku kishte furnizuar Perryn dhe asistentin e tij me të paktën 20 shishe ketaminë, shiringa dhe tableta për thithje brenda një periudhe dyjavore, jashtë çdo protokolli mjekësor. Dërgesat bëheshin në ambiente të pazakonta, madje edhe në parkingje, duke shkelur hapur çdo normë profesionale dhe ligjore.
Në një prej komunikimeve me mjekë të tjerë, Plasencia e kishte quajtur Perryn “idiot” dhe përmendte pagesa marramendëse deri në 12 mijë dollarë për vizita në shtëpi, duke zbuluar një realitet tronditës të abuzimit me profesionin dhe me pacientë në gjendje të brishtë.
Hetimet kanë nxjerrë në dritë një rrjet të gjerë personash të përfshirë në furnizimin me ketaminë të aktorit të njohur për betejën e tij të gjatë me varësinë. Asistenti personal i Perry, Kenneth Iwamasa, ka pranuar se i dorëzoi aktorit substancën ditën kur ai ndërroi jetë. Po ashtu, Eric Fleming pranoi se kishte shpërndarë dozën fatale që kishte marrë nga Jasveen Sangha – e njohur në media si “Mbretëresha e ketaminës”.
Sangha është e vetmja nga të akuzuarit që nuk ka pranuar fajin dhe do të përballet me një proces gjyqësor më vonë gjatë vitit.
Matthew Perry u gjet i pajetë më 28 tetor 2023 në shtëpinë e tij në Los Angeles. Autopsia konfirmoi se vdekja kishte ardhur si pasojë e efekteve të ketaminës, duke rikthyer vëmendjen mbi mungesën e kontrollit në përdorimin e substancave narkotike në sistemin shëndetësor amerikan.