Të ardhurat nga turizmi gjatë nëntë muajve të parë të vitit kanë arritur në rreth 4.4 miliardë euro, bëri të ditur kryeministri Edi Rama gjatë konferencës së fundvitit me gazetarët.
Gjatë prezantimit të bilancit sipas sektorëve kryesorë të ekonomisë, Rama theksoi se turizmi ka vijuar trendin pozitiv të rritjes. Sipas tij, sektori ka shënuar një përmirësim të dukshëm edhe këtë vit, bazuar në të dhëna konkrete dhe jo në vlerësime subjektive.
Kryeministri nënvizoi se krahasuar me vitin 2024, numri i vizitorëve të huaj ka shënuar një rritje që i afrohet 7 për qind, duke e cilësuar këtë si një rritje të rëndësishme për turizmin shqiptar. Ai sqaroi se kjo rritje lidhet me turistët e huaj dhe jo me shtetasit shqiptarë.
Rama vuri në dukje gjithashtu zgjerimin e ndjeshëm të hapësirave të plazheve publike. Sipas tij, krahasuar me një vit më parë, sipërfaqja e plazheve publike është rritur me rreth 18 për qind, ose 1.1 milionë metra katrorë më shumë.
Në këtë kuadër, ai bëri të ditur se numri i parcelave ranore publike është rritur nga 523 në 1014, ndërsa puna po vijon edhe për sezonin e ardhshëm veror me iniciativa të reja që synojnë përmirësimin e mëtejshëm të ofertës turistike.