Presidenti amerikan Donald Trump deklaroi se Shtetet e Bashkuara po shesin armë aleatëve të NATO-s në Evropë, të cilët më pas po ia dorëzojnë ato Ukrainës, për të përballuar sulmet ruse me raketa dhe dronë.
“NATO po paguan 100% për këto armë”, tha Trump në një intervistë për NBC, duke nënvizuar se kjo strategji ndihmon në shmangien e një përfshirjeje më të drejtpërdrejtë të SHBA-së në konflikt.
Ndërkohë, Sekretari i Shtetit Marco Rubio theksoi se armët e prodhuara në SHBA po shiten aleatëve evropianë për t’u zhvendosur më shpejt në Ukrainë. “Është më efikase të transportosh një sistem nga Gjermania sesa nga një fabrikë në SHBA drejt frontit ukrainas”, u shpreh ai në Kuala Lumpur.
Ukraina ka ngritur alarmin për mungesë të sistemeve ajrore “Patriot”, ndërsa qëndrimi i administratës republikane mbi ndihmën ushtarake ndaj Kievit ka qenë herë pas here i paqartë. Megjithatë, Trump theksoi se dërgesat e armëve mbrojtëse do të vijojnë.