Presidenti i Shteteve të Bashkuara, Donald Trump, ka rikthyer retorikën e tij vetëlavdëruese ndaj rolit që pretendon se ka luajtur në forcimin e NATO-s. Përmes një postimi në rrjetin social Truth Social, Trump deklaroi se asnjë president amerikan apo udhëheqës tjetër botëror nuk ka bërë më shumë për aleancën euroatlantike sesa ai.
Sipas Trump, përpara se ai të merrte drejtimin e Shtëpisë së Bardhë, NATO ndodhej në një fazë dobësimi dhe rrezikonte të shpërbëhej. Ai argumentoi se presioni i ushtruar nga administrata e tij ndaj vendeve anëtare për të rritur shpenzimet për mbrojtjen ka qenë vendimtar për mbijetesën e aleancës. Në këtë kuadër, Trump theksoi se pa ndërhyrjen e tij, NATO sot “nuk do të ekzistonte” dhe do të ishte zhdukur nga skena ndërkombëtare, duke përfunduar, sipas tij, “në hirin e historisë”.
“Askush nuk ka bërë më shumë për NATO-n se unë. Është e trishtueshme, por kjo është e vërteta”, shkroi Trump, duke nënvizuar se veprimet e tij e kanë detyruar aleancën të ndryshojë qasje dhe të forcojë kapacitetet e saj ushtarake.
Deklaratat e Trump vijnë në një kohë kur roli dhe e ardhmja e NATO-s mbeten tema qendrore në debatet politike ndërkombëtare, veçanërisht për shkak të tensioneve gjeopolitike dhe sfidave të sigurisë globale. Qëndrimet e tij kanë shkaktuar reagime të shumta në të kaluarën, me kritikë që i cilësojnë deklaratat si të ekzagjeruara, ndërsa mbështetësit i shohin si reflektim të një politike më të ashpër ndaj aleatëve.