Në Shtetet e Bashkuara është shënuar një tjetër tronditje në kryesinë ushtarake.
Ministri i Mbrojtjes, Pete Hegseth, ka shkarkuar gjeneral-lejtnantin Jeffrey Kruse, shefin e Agjencisë së Inteligjencës së Mbrojtjes (DIA).
Sipas burimeve për agjencinë AP, vendimi erdhi pas zemërimit të presidentit Donald Trump, i cili nuk u pajtua me raportin paraprak të agjencisë mbi dëmet në programin bërthamor iranian pas sulmeve amerikane.
Raporti i DIA-s, që u rrjedh në media muaj më parë, theksonte se sulmet kishin penguar programin iranian vetëm për disa muaj – një përfundim që binte ndesh me deklaratat e Trumpit dhe kryeministrit izraelit Benjamin Netanyahu, të cilët pretendonin se ishte bërë një goditje vendimtare.
Ky vendim pritet të shtojë debatet mbi drejtimin e Pentagonit nën Hegsethin, i cili më herët ka shkaktuar polemika për “pastrimet” në ministri, si dhe për një incident kur ndau plane sekrete për një sulm në Jemen në aplikacionin Signal, ku gabimisht ndodhej edhe një gazetar i The Atlantic.