PESHKOPI– Teksa jemi vetëm pak orë larg ndërrimit të viteve policia vijon planin e posaçëm operacional për ndalimin e tregtimit të kundërligjshëm dhe të rrezikshëm të lëndëve piroteknike nga subjekte të paautorizuara.
Bëhet me dije se në qytetin e Peshkopisë janë konstatuar 3 dyqane ku mbaheshin sasi fishekzjarrësh dhe kapsollash, në kundërshtim me rregullat dhe kriteret e përcaktuara.
Procedohen penalisht 3 shtetas dhe sekuestrohen kuti me lëndë piroteknike.
Në vijim të zbatimit të planit të masave, të hartuar në prag të festave të fundvitit, me objektiv parandalimin dhe goditjen e rasteve të posedimit të lëndëve piroteknike me qëllim shitjen e kundërligjshme të tyre, shërbimet e Komisariatit të Policisë Dibër, evidentuan 3 dyqane që ushtronin këtë veprimtari të paligjshme.
Për këto raste, u referuan materialet në Prokurori, ku filloi procedimi penal për shtetasit O.D., A.K. dhe D.M., pasi në dyqanet e tyre u gjetën kuti me lëndë piroteknike, të cilat mbaheshin me qëllim shitjen e tyre, në kundërshtim me rregullat dhe kriteret e përcaktuara.
Materialet procedurale iu referuan Prokurorisë së Dibrës për veprime të mëtejshme.
“Blutë” e Dibrës apelon për të gjithë qytetarët që të mos përdorin dhe të mos tregtojnë lëndë piroteknike në kundërshtim me rregullat dhe kriteret e përcaktuara, pasi kjo veprimtari, që përbën rrezik për jetën dhe shëndetin e tyre, ndëshkohet konform ligjit./Radar.al