Një ngjarje tragjike ka tronditur së fundmi qytetin e Curitibas në Brazil, ku një grua 24-vjeçare humbi jetën pas një incidenti të tmerrshëm në një hotel lokal.
Bëhet fjalë për Gabrielle Christine Barreto de Freitas, e cila ra në një vaskë me ujë të nxehtë duke pësuar kështu djegie të rënda në trup.
Ndërsa pak ditë pas ngjarjes së rëndë mësohet të ketë ndërruar jetë në spital, si rrjedhojë e një ataku zemre.
Familjarët kanë dëshmuar se Gabrielle ishte duke kaluar kohë me një mik në hotel në momentin e tragjedisë, kur ai rregulloi temperaturën e ujit në xhakuzi në nivel shumë të lartë e pas kësaj shkoi të flinte. Kur papritmas shoku ka dëgjuar rrëshqitjen e saj dhe e gjeti të fundosur në ujë, me lëkurën që i shkëputej nga trupi për shkak të djegieve të shkallës së tretë.
Familja mbetet e paqartë mbi shkaqet e vdekjes, ndërsa autoritetet po vijojnë me hetimet për të përcaktuar përgjegjësinë dhe për të kontrolluar nëse pajisjet e hotelit funksiononin siç duhet.
Gabrielle ishte nëna e një djali 5-vjeçar, i cili tani jeton me gjyshen e tij.