Një thirrje e bërë nga Ambasada e Iranit në Londër ka shkaktuar reagime të forta dhe shqetësime për sigurinë në Mbretëria e Bashkuar.
Sipas raportimit të Daily Mail, ambasada u ka bërë thirrje qytetarëve iranianë që jetojnë në Britani të regjistrohen në një program të quajtur “Jan Fada” (“sakrificë e jetës”), përmes një mesazhi të publikuar në gjuhën perse në Telegram.
Mesazhi u drejtohej “bashkatdhetarëve krenarë” dhe i ftonte ata të shprehnin besnikëri dhe solidaritet, duke përfshirë edhe thirrje për sakrificë, çka ka ngritur shqetësime për përmbajtjen dhe ndikimin e mundshëm.
Ekspertët e sigurisë paralajmërojnë se iniciativa mund të përdoret për të nxitur radikalizim. Roger McMillan e cilësoi situatën si alarmante, duke sugjeruar se mund të synojë mobilizimin e individëve në mbështetje të regjimit iranian edhe jashtë vendit.
Nga ana tjetër, aktivisti për të drejtat e njeriut Nadeh Fala kërkoi që Garda Revolucionare e Iranit të shpallet organizatë terroriste, duke theksuar rrezikun e ndikimit të saj në diasporë.
Programi i referon të interesuarit drejt platformës konsullore “Mikhak”, e përdorur zakonisht për shërbime administrative, si aplikimet për dokumente.
Zhvillimi vjen në një klimë të tensionuar në Londër, ku autoritetet po hetojnë edhe incidente të tjera të lidhura me grupe të dyshuara pro-iraniane. Kryeministri Keir Starmer ka paralajmëruar më herët mundësinë e shpalljes së Gardës Revolucionare si organizatë terroriste, ndonëse ende nuk ka një vendim përfundimtar.
Ndërkohë, ambasada iraniane ka mohuar çdo lidhje me nxitjen e dhunës, duke theksuar se iniciativa synon vetëm forcimin e ndjenjës së përgjegjësisë kombëtare dhe duke i cilësuar kritikat si të pabazuara.