Bota e sportit është tronditur nga lajmi i ndarjes nga jeta të kampionit olimpik norvegjez, Audun Grønvold, i cili humbi jetën në mënyrë tragjike pas një goditjeje rrufeje. Ngjarja ndodhi teksa ndodhej në një kabinë familjare në Norvegji, ku një stuhi elektrike i mori jetën në moshën 49-vjeçare.
Pavarësisht përpjekjeve të menjëhershme për ta transportuar në spital, ai nuk arriti të mbijetonte.
Grønvold ishte një figurë e njohur e sporteve dimërore, i cili nga skijimi alpin kaloi me sukses në ski cross, ku arriti majat e botës: medalje bronzi në Lojërat Olimpike Dimërore të Vancouver 2010, podiume në Kupën e Botës, dhe një karrierë të pasur si sportist dhe më vonë si trajner dhe komentator sportiv.
Presidentja e Federatës Norvegjeze të Skijimit, Tove Moe Dyrhaug, e quajti humbjen e tij një boshllëk të pazëvendësueshëm për sportin norvegjez, ndërsa trajneri i tij i dikurshëm, Marius Arnesen, e përshkroi Grønvold si “një talent të rrallë, me ndjesi të jashtëzakonshme për borën dhe terrenin”.
Pas vetes la bashkëshorten Kristin dhe tre fëmijët e tij, si dhe një trashëgimi të madhe në historinë e sporteve dimërore. Trishtimi dhe dhimbja për këtë humbje ndihen thellë në të gjithë komunitetin sportiv.