Tre alpinistë amerikanë kanë humbur jetën këtë javë në Parkun Kombëtar të Kanionit të Madh në Arizonë, si pasojë e temperaturave ekstreme që kanë goditur zonën, raportojnë mediat lokale.
Autoritetet bëjnë të ditur se temperaturat brenda kanionit mund të kalojnë 43°C, madje edhe në zona me hije, duke e bërë aktivitetin e ecjes në shtigje veçanërisht të rrezikshëm gjatë orëve të ditës.
Sipas Associated Press, një burrë 72-vjeçar u sëmur nga nxehtësia më 12 qershor teksa po ecte në Shtegun South Kaibab. Ai ndërroi jetë para mbërritjes së ekipeve të shpëtimit.
Vetëm katër ditë më vonë, një burrë 67-vjeçar dhe një grua 68-vjeçare u përballën gjithashtu me probleme shëndetësore të shkaktuara nga i nxehti gjatë një ecjeje në Shtegun North Kaibab, duke humbur jetën para se të mbërrinte ndihma.
Shërbimi i Parqeve Kombëtare të SHBA-së deklaroi se, pavarësisht reagimit të menjëhershëm të ekipeve të emergjencës, të tre alpinistët nuk arritën të mbijetonin.
Autoritetet kanë vënë në dukje rritjen e rasteve të goditjes nga nxehtësia në javët e fundit dhe u kanë bërë thirrje vizitorëve të shmangin aktivitetet në natyrë midis orës 10:00 dhe 16:00, kur temperaturat arrijnë kulmin.
Trupat e viktimave janë dërguar në Zyrën e Mjekut Ligjor të Qarkut Coconino, ku ka nisur hetimi për të përcaktuar shkaqet e sakta të vdekjeve.