Kryeministri Edi Rama deklaroi sot se me mbylljen e platformës së Tik Tok në Shqipëri, nxënësve u është siguruar mbrojtje nga një influencë negative.
Ai foli gjithashtu lidhur me shkarkimin e VPN në telefona, për të cilin tha se është shumë e rrezikshme sepse sipas tij, ato e bëjnë telefonin plotësisht të grabitshëm me të gjitha të dhënat që ka brenda.
Rama njoftoi se kanë hyrë në një dialog me kompaninë përmes AKSH-it dhe ministrisë së Arsimit dhe kanë kërkuar nga kompania që nëse do që të ketë akses në Shqipëri duhet të paraqesë një propozim të besueshëm dhe bindës për një numër të caktuar filtrash për fëmijët.
“Më vjen mirë që Tik Tok është mbyllur dhe nxënësve ju kemi siguruar një mbrojtje nga një influencë shumë negative që i qëndronte mbi kokë 24 në 24. Përsëris për të gjithë dhe mirë është që mësuesit tua thonë prindërve dhe nxënësve që përpjekja për të instaluar tik tok duke përdorur VPN të lira është shumë e rrezikshme sepse ato e bëjnë telefonin plotësisht të grabitshëm me të gjitha të dhënat që ka brenda”, tha Rama.
Ai deklaroi më tej se “ne kemi hyrë në një dialog me kompaninë përmes AKSH-it dhe ministrisë së Arsimit dhe kemi kërkuar nga kompania që nëse do që të ketë akses në Shqipëri duhet të na paraqesë një propozim të besueshëm dhe bindes për një numër të caktuar filtrash për fëmijët tanë dhe një program specifik për të stimuluar mësimin, mësimin e shkencës, matematikës etj”.
“Ndërkohë që duhet të na garantojë që fëmijët janë të mbrojtur nga pjesët e rrezikshme. Kompania e ka marrë seriozisht dhe në ka premtuar se do ta na i paraqesë këtë propozim. Çfarë kompania do të na ofrojë do të duhet të ndahet me mësuesit dhe prindërit. Shpresoj që në një kohë jo shumë të largët ata do të vijnë dhe ne do rikthehemi tej ju dhe do ti ndajmë këto të dhëna që do marrim nga propozimi i kompanisë”, u shpreh kryeministri.