Policia e Kosovës ka shoqëruar disa qytetarë serbë në përfundim të manifestimit të “Vidovdanit” në Gazimestan, pasi gjatë tubimit ata kanë bërë thirrje nacionaliste si “Kosova është Serbi” dhe kanë kënduar këngë me përmbajtje provokuese.
Pavarësisht masave të shtuara të sigurisë dhe kontrolleve të rrepta, disa pjesëmarrës kanë arritur të fusin në vendngjarje një flamur me simbole patriotike serbe.
Po ashtu, dy persona janë shoqëruar në polici për veprime të veçanta: njëri për përdorimin provokues të një pistolete plastike dhe tjetri për veshjen e një bluze me foton e Aleksandër Arsenijeviq, person i dyshuar për krime lufte.
Policia e Kosovës ka njoftuar se veprimet e ndërmarra janë bërë në përputhje me ligjin dhe për të garantuar rendin dhe sigurinë gjatë zhvillimit të aktivitetit.