Një konflikt i ashpër është regjistruar mbrëmjen e së premtes në qytetin e Sarandës, ku disa persona janë përfshirë në një përplasje fizike që ka përfunduar me të lënduar dhe ndërhyrjen e forcave të policisë.
Ngjarja ka ndodhur rreth orës 23:00 në lagjen nr. 3, në zonën e njohur si “Ekualipsi”, ku, sipas informacioneve paraprake, konflikti ka nisur për motive të dobëta. Të përfshirët janë goditur me grushte dhe sende të forta, duke shkaktuar tension dhe panik në zonë.
Menjëherë pas njoftimit, në vendngjarje kanë mbërritur forca të shumta të Policisë së Sarandës, të mbështetura edhe nga efektivë të FNSH-së. Si rezultat i ndërhyrjes, gjashtë persona janë shoqëruar në komisariat për veprime të mëtejshme procedurale.
Burime bëjnë me dije se disa nga personat e përfshirë në konflikt janë paraqitur në Spitalin e Sarandës për të marrë ndihmë mjekësore për dëmtimet e pësuara.
Policia vijon hetimet për zbardhjen e plotë të rrethanave të ngjarjes dhe identifikimin e përgjegjësive të secilit prej të përfshirëve.