Thethi është shndërruar këto ditë në një zonë tensioni dhe përplasjesh. Prishja e disa ndërtimeve pa leje nga Inspektorati Kombëtar i Mbrojtjes së Territorit (IKMT) ka shkaktuar reagim të fortë nga banorët, duke kulmuar sot me hedhjen e molotovëve dhe përleshje me forcat e rendit.
Nga përplasjet është dëmtuar edhe ura karakteristike prej druri, ndërsa policia ka ndërhyrë me forca të armatosura, të pajisura me kallashnikovë, për të vënë situatën nën kontroll.
Pamjet nga terreni tregojnë një atmosferë kaotike, me praninë e banorëve të revoltuar dhe forca policie të pozicionuara në gatishmëri. Fatmirësisht nuk raportohet për persona të lënduar, ndërsa dëmet janë vetëm materiale.
Ngjarja ndodh në kulmin e sezonit turistik, duke hedhur një hije mbi imazhin e Thethit si një prej destinacioneve më të frekuentuara të verës.