Temperaturat e larta që kanë përfshirë vendin gjatë ditëve të fundit kanë sjellë një rritje të lehtë të rasteve që kërkojnë ndihmë emergjente. Skënder Brataj, kreu i Urgjencës Kombëtare, deklaroi se aktualisht regjistrohen rreth 160 thirrje në ditë, një shifër më e lartë krahasuar me muajin maj. Ai theksoi se fëmijët, të moshuarit dhe personat me sëmundje kronike janë më të rrezikuarit nga efektet e vapës dhe u bëri apel qytetarëve që të tregojnë kujdes të shtuar në këtë periudhë. Sipas Bratajt, përdorimi i kondicionerëve duhet bërë me kujdes duke u siguruar që filtrat janë të pastër dhe temperatura të mbahet në nivelin optimal.
Ai rekomandon që njerëzit të shmangin daljet në diell në orët më të nxehta të ditës, të konsumojnë sa më shumë lëngje dhe të ruajnë higjienën ushqimore pasi të nxehtit favorizon përhapjen e infeksioneve dhe virozave.
Gjithashtu vlerësohet e rëndësishme që personat me shenja lodhjeje, marramendjeje apo turbullimi të shikimit të kërkojnë pushim dhe ndihmë të menjëhershme. Nëse nuk merren masa parandaluese, rreziku për goditje nga i nxehti është real dhe mund të prekë edhe individë që më parë nuk konsideroheshin në grup risku.