Sipas dosjes të siguruar nga SPAK, Marklen Haka luajti rolin e sigurimit të informacioneve për lokalizimin e shtetasit Durim Bami, me synim vrasjen e tij.
Këto informacione, Haka i ndante me shtetasin Emiljano Shullazi me të cilin komunikonte nëpërmjet aplikacionit SKY ECC.
Përgjatë bisedës të regjistruar në datën 10 janar 2020, Emiljano Shullazi komunikon me Marklen Hakën në lidhje me Valter Bamin, I cili lëvizte me një makinë tip “Range Rover”.
Emiljano Shullazi shprehet në një moment: “Kape mos ja zgjat, se jam ktu dhe robt që janë jashtë me fol kuptohet dhe e kanë pak problem me ardh në Nikël dhe me mbaru punë. Po të jem vetë e mbaroj aty tek dera e shtëpisë. Ky legeni që është këtu në burg Rraja (Redjan Rraja) thotë që Duri (Durim Bami) është më i fuqishmi aty, i bën reklamë.”
Në një tjetër bisedë një ditë më vonë, zbulohet se Emiljano Shullazi i kërkon Hakës të angazhojë dhe shtetasin Albert Zaja për të vrarë Durim Bamin.
“Ngreje pak këtë Zajën se ju aty te bilardo e keni kollaj dhe në darkë nuk kapim mirë kamerat.” i shkruan Shullazi.
Në vazhdimësi të bisedës dyshohet se Marklen Haka i jepte informacione Shullazit në lidhje me automjetet dhe lëvizjet që kryen Durim Bami.
Emiljano Shullazi i shkruan: Si t’ja bëjmë me e kap k….. ma e rrjep ma e torturu, ishalla ta mbysin fort. Se tani s’ka blind që e ruan…”.
SPAK e akuzon Marklen Hakën për veprat penale “Vrasje me paramendim”, e mbetur në tentative, në dëm të shtetasit Durim Bami, ngjarje e ndodhur në datën 04.11.2020 në qytetin e Tiranës, kryer në formë të veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi ; strukturuar kriminal dhe Organizata kriminale “.