Zëvendëspresidenti amerikan JD Vance dhe shefi i Shtabit të Përgjithshëm të Forcave të Armatosura, gjenerali Dan Caine, kanë shprehur shqetësime për rrezikun e përshkallëzimit të konfliktit me Iranin, ndërsa presidenti Donald Trump po shqyrton zgjerimin e operacioneve ushtarake. Lajmi është raportuar nga CNN, duke cituar një burim të njohur me zhvillimet dhe një zyrtar amerikan.
Sipas raportimit, gjatë një takimi të zhvilluar të premten në Shtëpinë e Bardhë, gjenerali Caine ngriti shqetësime për rezervat e municioneve të ushtrisë amerikane dhe pasojat që mund të sillte një ofensivë më e gjerë kundër Iranit. Ai i ka bërë të qartë presidentit se ushtria është e gatshme të zbatojë çdo urdhër, por ka paralajmëruar edhe për rreziqet e një përshkallëzimi të konfliktit.
CNN raporton gjithashtu se sulmet ajrore amerikane ndaj Iranit janë vendosur përkohësisht në pritje, pas gati dy javësh bombardimesh të njëpasnjëshme. Ende nuk dihet nëse ky pezullim lidhet drejtpërdrejt me diskutimet e zhvilluara në Shtëpinë e Bardhë apo me faktorë të tjerë.
Drejtori i Komunikimit i Shtëpisë së Bardhë, Steven Cheung, deklaroi se presidenti Trump vazhdon të favorizojë një zgjidhje diplomatike, por nuk përjashton asnjë opsion nëse Irani vijon veprimet që SHBA i konsideron kërcënuese në Ngushticën e Hormuzit ose ndaj aleatëve të saj.
Pas takimit me kabinetin dhe këshilltarët e sigurisë, Trump tha se negociatat me Iranin janë ende në vijim, ndërsa la të hapur mundësinë e rifillimit ose intensifikimit të bombardimeve, duke shtuar se Teherani duket se po tregohet “më serioz” në bisedime.
Sipas CNN, disa shtete të Gjirit Persik u kanë kërkuar zyrtarëve amerikanë të tregojnë përmbajtje, ndërsa edhe brenda administratës dhe Pentagonit ka dyshime nëse një përshkallëzim i mëtejshëm ushtarak do të arrinte objektivat e synuara nga presidenti Trump.
Nga ana tjetër, zëdhënësi i Pentagonit, Sean Parnell, theksoi se ushtria amerikane mbetet plotësisht e përgatitur për të zbatuar çdo vendim të presidentit dhe disponon kapacitetet e nevojshme për të mbrojtur interesat e Shteteve të Bashkuara.