Presidenti i Ukrainës, Volodymyr Zelensky, udhëton sot drejt Floridës për të zhvilluar një takim të rëndësishëm me presidentin amerikan Donald Trump, në përpjekje për të forcuar pozicionin e Kievit dhe për të siguruar mbështetjen e SHBA-së për versionin e fundit të planit të paqes që synon të përfundojë konfliktin katërvjeçar me Rusinë.
Zelensky mbërrin në Shtetet e Bashkuara me propozime të reja, duke përfshirë çështjet e ndjeshme territoriale. Megjithatë, Trump theksoi për Politico se çdo vendim përfundimtar do të varet nga aprovimi i tij: “Nuk do të ketë asgjë derisa unë ta miratoj.” Megjithatë, presidenti amerikan u shpreh optimist, duke deklaruar se pret që takimi të shkojë mirë dhe shpreson në bashkëpunim edhe me presidentin rus, Vladimir Putin, me të cilin planifikon të takohet së shpejti.
Nga ana e tij, Zelensky shprehu shpresë se bisedimet do të jenë “shumë konstruktive”, gjatë një ndalese të shkurtër në Kanada, ku u takua me udhëheqës evropianë. Kancelari gjerman Friedrich Merz siguroi Ukrainën për “mbështetje të plotë”, ndërsa kryeministri kanadez Mark Carney njoftoi ndihmë financiare të re në vlerë prej 2.5 miliardë dollarësh kanadezë.