Kantautori i njohur Stine, i ftuar në podcastin “FLET” me Ilnisa Agollin në Top Channel, ka folur pa doreza për realitetin e festivaleve muzikore në Shqipëri, duke shprehur zhgënjimin e thellë për mënyrën si funksionojnë sot këto ngjarje artistike.
“Nuk e di nëse do të marr më pjesë në festivale. Nuk ka më konkurrencë reale. Në momentin që çdo gjë është e paracaktuar, nuk ka më kuptim për mua. Promovohen miqtë, jo artistët e vërtetë,” u shpreh këngëtari.
Stine, i njohur për karrierën e tij të gjatë dhe këngët e paharrueshme, tha se ende nuk e ka prekur kulmin e karrierës dhe se nuk ka filluar ende të realizojë çfarë dëshiron me të vërtetë.
Kur u pyet për ndryshimet mes festivaleve të dikurshme dhe atyre të sotme, ai u përgjigj se mungon transparenca dhe ndershmëria:
“Sot bëhen manipulime. Ose bën kompromis me sistemin, ose tërhiqesh.”
Artisti shtoi se ndjehet emocionalisht i lidhur me garën dhe konkurrencën, por zhgënjimi me mënyrën si trajtohen talentet dhe drejtësia në ndarjen e çmimeve, e ka bërë të mendojë seriozisht nëse ia vlen të vazhdojë pjesëmarrjen në festivale.
Me një mesazh të qartë për industrinë, Stine theksoi se për sa kohë favorizohen lidhjet personale në vend të vlerës artistike, skena muzikore shqiptare do të ngelet në vendnumëro.