Nga Athina, ministrja për Evropën dhe Punët e Jashtme, Elisa Spiropali, ka kërkuar zyrtarisht heqjen e Ligjit të Luftës me Shqipërinë nga Greqia, duke e cilësuar atë si një referencë ligjore atavike, të trashëguar nga Lufta e Dytë Botërore dhe pa asnjë lidhje me realitetin e sotëm të marrëdhënieve dypalëshe.
Gjatë një konference të përbashkët për shtyp me homologun e saj grek, Giorgos Gerapetritis, Spiropali theksoi se takimet e zhvilluara në Athinë kanë forcuar bindjen se Shqipëria dhe Greqia ndodhen në një moment të pjekur për të trajtuar në mënyrë gjithëpërfshirëse si çështjet e mbetura nga e shkuara, ashtu edhe ato aktuale, me synimin për të hapur një kapitull të ri në marrëdhëniet mes dy vendeve.
Ajo nënvizoi se potenciali i miqësisë dhe bashkëpunimit mes dy popujve krijon kushtet e duhura për ta parë përfundimisht të shkuarën përmes perspektivës së një të ardhmeje të përbashkët europiane. Në këtë kuadër, ministrja vuri theksin te rëndësia e forcimit të komunikimit mes shoqërive, botës akademike, organizatave profesionale, grupeve të interesit dhe studentëve, si një bazë e qëndrueshme për afrimin afatgjatë mes dy vendeve.
Duke iu referuar marrëdhënieve strategjike, Spiropali kujtoi se Shqipëria dhe Greqia janë aleate në NATO, të lidhura nga një Traktat Miqësie dhe të orientuara drejt një perspektive të përbashkët europiane. Në këtë kontekst, ajo theksoi se mbajtja në fuqi e një reference ligjore të trashëguar nga Lufta e Dytë Botërore është në kundërshtim me frymën e partneritetit dhe nuk pasqyron marrëdhëniet reale mes dy vendeve si aleatë dhe miq.
Sipas saj, heqja e këtij ligji do të përbënte një hap të rëndësishëm simbolik dhe praktik, që do të forconte më tej bashkëpunimin dypalësh dhe vizionin e përbashkët europian. Spiropali falënderoi ministrin Gerapetritis për lidershipin dhe vizionin e tij, duke vlerësuar qasjen e orientuar drejt së ardhmes në ndërtimin e marrëdhënieve mes Shqipërisë dhe Greqisë.
Në lidhje me çështjen e pronave të qytetarëve dhe subjekteve shqiptare në Greqi, ministrja deklaroi se kjo temë është trajtuar hapur në kuadër të dialogut konstruktiv mes dy palëve. Ajo theksoi nevojën për një qasje graduale dhe realiste, në përputhje me kuadrin ligjor përkatës dhe me frymën europiane, me qëllim forcimin e besimit reciprok dhe zhvillimin e mëtejshëm të marrëdhënieve miqësore.
Sa u përket çështjeve kufitare, përfshirë edhe delimitimin e hapësirave detare, Spiropali u shpreh se Shqipëria mbetet e përkushtuar për zgjidhjen e tyre në përputhje me të drejtën ndërkombëtare dhe parimet e fqinjësisë së mirë. Ajo theksoi se të dyja palët janë plotësisht të hapura për dialog konstruktiv dhe se procesi do të udhëhiqet nga vlerat themelore të Bashkimi Europian, respekti për normat e së drejtës ndërkombëtare dhe angazhimi për zgjidhjen paqësore të mosmarrëveshjeve.
Ministrja Elisa Spiropali ndodhet në Greqi në kuadër të një vizite zyrtare dyditore, e cila synon thellimin e dialogut politik dhe forcimin e mëtejshëm të marrëdhënieve mes dy vendeve fqinje.