Kryetari i Diasporës Shqiptare në Greqi, Etmond Guri, ka reaguar lidhur me protestat që po zhvillohen në Vlorë dhe Tiranë kundër projektit të investimit në zonën e Zvërnecit.
Në një intervistë për Radar.al, Guri deklaroi se pjesëmarrja e qytetarëve të ardhur nga Greqia në këto protesta është e konfirmuar dhe nuk bëhet fjalë për pretendime të pabazuara.
Sipas tij, media greke ka raportuar gjerësisht për organizimin e udhëtimeve drejt Shqipërisë për të marrë pjesë në tubimet kundër projektit.
“Nuk është çështje pretendimi. Është një artikull i konfirmuar me emër e mbiemër nga një prej bashkëorganizatorëve, ku Kathimerini, gazeta më prestigjioze dhe media më prestigjioze në Greqi, ka pasur një artikull të detajuar jo vetëm për autobusët që kanë ardhur në Shqipëri, por edhe për shumë automjete të banorëve të zonës nga Athina”, u shpreh Guri.
Ai shtoi se personat që udhëtuan nga Greqia për të marrë pjesë në protesta kishin dijeni paraprake për organizimin e tyre.
“Ishin të paralajmëruar para protestës, pra ishin në dijeni dhe ishin në organizim e sipër”, deklaroi kreu i Diasporës Shqiptare në Greqi.
Deklaratat e Gurit vijnë në mes të debatit publik që ka shoqëruar projektin e planifikuar në Zvërnec dhe protestat e organizuara kundër tij nga banorë dhe aktivistë.