Një incident i pazakontë ka ndodhur gjatë një aktiviteti elektoral të organizuar nga deputeti i Partisë Socialiste, Vullnet Sinaj, në qytetin e Himarës. Në përpjekje për të dhënë një shfaqje të paharrueshme për mbështetësit, në ngjarje u përfshi edhe një parashutist, por “spektakli ajror” për pak u kthye në tragjedi.
Xhonatan Ismali, një nga emrat më të njohur të sportit të parashutizmit në Shqipëri, u përfshi në incident teksa po zbriste me parashutë në zonën e Potamit. Megjithëse i pajisur me eksperiencë dhe trajnim të lartë, ai nuk arriti të kontrollonte siç duhej uljen dhe përfundoi i rrëzuar, duke shkaktuar panik mes të pranishmëve. Fatmirësisht, ndërhyrja e menjëhershme e ekipit të emergjencës bëri të mundur që ai të shpëtonte pa dëmtime serioze.
Të parët që konfirmuan gjendjen e tij ishin të afërmit, mes tyre edhe partnerja e tij, moderatorja Roza Lati, e cila reagoi në rrjetet sociale duke siguruar ndjekësit: “Çdo gjë është në rregull. Shëndoshë e mirë. Shqiponja nuk vritet kollaj. Shqiponja është mbreti i qiellit.”
Ndërkohë, Policia e Himarës ka nisur procedim penal ndaj 28-vjeçarit për “ulje të rrezikshme dhe të papërgjegjshme në një zonë publike”, duke vlerësuar se mënyra e organizimit dhe realizimit të hedhjes me parashutë ka përbërë rrezik për jetën e tij dhe të të tjerëve. Materialet janë referuar tashmë në Prokurori, ndërsa parashutisti ndodhet jashtë rrezikut për jetën në spitalin rajonal.
Njoftimi:
Specialistët për Hetimin e Krimeve në Komisariatin e Policisë Himarë referuan materiale në Prokurori, pasi ditën e djeshme, në vendin e quajtur ‘Potam’, Himarë, është dëmtuar aksidentalisht gjatë hedhjes me parashutë shtetasi Xh. I., 28 vjeç, banues në Tiranë, i cili ndodhet në spital, jashtë rrezikut për jetën.