Gjykata Speciale në Hagë ka vendosur të vazhdojë masën e paraburgimit ndaj ish-presidentit të Kosovës, Hashim Thaçi, lidhur me akuzat për pengim të drejtësisë.
Në vendimin e saj, gjykatësja paraprake Marjorie Masselot vlerësoi se ekziston ende rrezik i lartë për arratisje, ndikim ndaj dëshmitarëve dhe mundësi për kryerje të veprave të tjera penale nga Thaçi. Sipas saj, këto rreziqe nuk mund të neutralizohen me masa më të lehta se paraburgimi.
Gjykata nënvizon se akuzat ndaj Thaçit përfshijnë shpallje të sekretit zyrtar, fyerje të gjykatës dhe pengim të zyrtarëve në ushtrimin e detyrës – të gjitha në kontekstin e procedurës për krime lufte dhe krime kundër njerëzimit që po zhvillohet në paralel ndaj tij.
Sipas gjykatëses, Thaçi ka pasur rol udhëheqës në struktura që kanë tentuar të ndikojnë te dëshmitarët, përfshirë përpjekje për shpërndarje të informacioneve të ndaluara dhe ofrim përfitimesh në këmbim të ndryshimit të dëshmive.
Më tej, Gjykata arsyetoi se paraburgimi në Hagë garanton nivel më të lartë sigurie për të parandaluar komunikimet e paautorizuara që mund të dëmtojnë procesin gjyqësor.
Procesi ndaj Thaçit, ndërkohë, vazhdon me ritëm të qëndrueshëm. Prokuroria ka dorëzuar pjesën më të madhe të provave, ndërsa mbrojtja ka paraqitur mocionet paraprake.
Gjykata ka lënë hapur mundësinë për rishikim të masës, duke i dhënë Thaçit afat deri më 27 qershor për të paraqitur parashtresa nëse dëshiron. Në të kundërt, Prokuroria do të japë qëndrimin e saj deri më 7 korrik 2025.