TIRANË-Anëtarët socialistë të Këshillit Bashkiak të Tiranës janë thirrur të mblidhen më datën 17 Shtator në orën 17:00, në selinë e Partisë Socialiste, për të zhvilluar mbledhjen e grupit të këshilltarëve socialistë.
Pavarësisht se nuk bëhet e ditur axhenda, natyrisht që temë diskutimi do të jetë vendimi i Këshillit Bashkiak për shkarkimin e kryetarit të Bashkisë, Erion Veliaj.
Ky vendim i cili do të jetë një mekanizëm politik për krijimin e mundësisë për zgjedhje të reja, mund të përballet me shqyrtim nga Gjykata Kushtetuese, pasi zoti Veliaj është ende në paraburgim dhe nuk ka asnjë vendim të formës së prerë që të provojë fajësinë e tij.
Burime nga ekipi i avokatëve të huaj të zotit Veliaj thonë se ai do të ankimojë vendimin, pasi është në procedurë e sipër për ta çuar çështjen në Strasburg, dhe një vendim i tillë humbet integritetin e procesit.
Sipas precedentit të Fredi Belerit, këshilli bashkiak nuk mund të vihet në lëvizje për shkarkim për shkak të mungesës në detyrë, pasi mungesa në detyrë është jo e vullnetshme dhe buron nga masa e paraburgimit. I njëjti precedent u përdor dhe për mosheqjen e mandatit të ish-kryeministrit Berisha, gjatë arrestimit të tij shtëpiak./Radar.al