TIRANË– Gjatë takimit me kryetarët e Bashkive, Kryeministri Edi Rama ka folur mbi lajmet e ndryshme që kanë qarkulluar, për një ulje të numrit të turistëve që kanë ardhur këtë vit në vendin Shqipëri.
Rama tha se po bëhet një sulm të organizuar mbi turizmin, sepse sipas tij janë identifikuar shumë profile fallso, që pretendojnë për boshatistjen e plazheve në Shqipëri. Kryeministri komentoi edhe zërat për një ulje të numrit të turistëve nga Kosova, gjë që sipas tij nuk bazohet në shifra.
“Sot ka një sulm të organizuar për të sulmuar turizmin shqiptar. Kam folur me kryetarët e Bashkive për këto lajme dhe video të rreme që qarkullojnë, sistemet tona të sigurisë kibernetike kanë ndezur dritat e kuqe, pasi ka shumë profile fallso që po qarkullojnë. Ajo lule e turizmit që erdhi vjet, solli me vete edhe sfida të reja. Shqipëria është me 86% rritje të fluksit të turizmit, është në vendin e parë në rajon, duke lënë pas të gjitha vendet e rajonit. Pjesë e këtij sulmi është dhe një përpjekje shumë e ulët, për të thënë që shqiptarët e Kosovës e kanë braktisur Shqipërinë. Fakti është që nga janari e në vazhdim ka 1.7 milionë qytetarë të Kosovës, me një rritje me mbi 20% nga viti i kaluar. Ka një rritje shumë të madhe të turistëve italianë, turq dhe polakë që kanë mbërritur në vendin tonë. Aeroporti i Tiranës është në pamundësi për të dhënë leje të uljes së avionëve charter për shkak të fluksit të fluturimeve. Për të ulur një charter në Rinas duhet të prenotosh tre ditë më përpara.”- ka thënë Rama.