Detaje të reja kanë dalë në pah në lidhje me vrasjen e palestinezes në Tiranë nga partneri i saj.
Motivet e ngjarjes së rëndë e cila u zbulua këtë të enjte në Tiranë vijojnë të mbeten të paqarta për hetuesit, por Policia ka arritur të identifikojë autorin e dyshuar nëpërmjet një telefonate.
Burimet bëjnë me dije se ka qenë pronarja e banesës ajo që zbulon se çifti e kishte telefonuar me një numër gjerman.
Për rrjedhojë autoritetet shqiptare kanë kontaktuar me oficerin e kontaktit në Gjermani dhe pas hetimeve të bëra kanë nxjerrë në pah se numri nuk ka qenë në emrin e 49-vjeçarit, por të një personi tjetër.
Ka qenë ky i fundit ka treguar se numri përdorej nga Fadi Alwan.
Nga këqyrja e kamerave të sigurisë rezulton se 49-vjeçari, pas kryerjes së krimit, u largua nga banesa më 22 shkurt dhe, po këtë ditë, është larguar në mbrëmje nga Rinasi drejt Greqisë.
Pasi ka shkuar në Athinë, ka udhëtuar drejt Amsterdamit.
Dyshohet se më pas ka përdorur transport publik për të lëvizur drejt Gjermanisë.
Policia dyshon se bashkëshorti i saj e ka qëlluar për vdekje 24-vjeçaren ditën që është larguar nga Shqipëria dhe, si fillim, e ka dhunuar, më pas e ka vrarë me thikë dhe e ka mbuluar me çarçaf.
Hetuesit kanë dyshime të forta se kemi të bëjmë me vrasje me paramendim, duke nisur që nga mënyra se si është kryer krimi dhe lëvizjet e qeta të 49-vjeçarit.