Miratimi i amnistisë për 447 të burgosur është shtyrë, pasi autoritetet shqiptare janë në pritje të një përgjigjeje nga Komisioni Europian për draft-ligjin.
Edhe pse amnistia, e miratuar nga qeveria në dhjetor, ishte planifikuar të diskutohej gjatë muajit prill në komisionet parlamentare, burime qeveritare bëjnë me dije se procesi është pezulluar përkohësisht. Shkak është pritja e një opinioni nga strukturat përkatëse në Bruksel, konkretisht nga drejtoria përgjegjëse (DGR), një procedurë që po ndiqet edhe për projektligje të tjera.
Sipas të njëjtave burime, ligjet me ndikim të gjerë në sistemin e drejtësisë po kalojnë më parë në filtrin e institucioneve europiane përpara se të shqyrtohen në Kuvend.
Amnistia në fjalë parashikon:
- Lirimin ose përfitimin e drejtpërdrejtë për 447 të burgosur
- Ulje dënimi për 853 të tjerë
- Përfitim për 5,077 persona në Shërbimin e Provës
- Pushimin e ndjekjes penale për rreth 14 mijë procedime për vepra të lehta, duke nisur nga viti 2024
Vendimi final për ecurinë e këtij projektligji do të varet nga përgjigjja që pritet nga Brukseli.