Në Bruksel u zhvillua sot Konferenca e pestë Ndërqeveritare midis Shqipërisë dhe Bashkimit Europian, e cila shënon një tjetër hap të rëndësishëm në rrugën drejt anëtarësimit të Shqipërisë në BE. Në këtë takim, u hapën zyrtarisht negociatat për grup-kapitullin 3 me titullin “Konkurrueshmëria dhe rritja gjithëpërfshirëse”.
Delegacioni i Bashkimit Europian u përfaqësua nga ambasadorja Agnieszka Bartol, Përfaqësuese e Përhershme e Polonisë në BE dhe drejtoresha e përgjithshme e Komisionit, Gert Jan Koopman, ndërsa delegacioni shqiptar u drejtua nga ministri për Evropën dhe Punët e Jashtme, Igli Hasani.
Ky grup përfshin disa kapituj kyç që trajtojnë aspekte të rëndësishme të zhvillimit ekonomik dhe social, përfshirë transformimin digjital dhe mediat, taksimin, politikën ekonomike dhe monetare, punësimin dhe politikën sociale, politikën industriale dhe ndërmarrjet, shkencën dhe kërkimin, arsimin dhe kulturën, si dhe unionin doganor.
Në kuadër të konferencës, Bashkimi Europian vendosi edhe kriteret dhe standardet për mbylljen e përkohshme të këtyre kapitujve, duke theksuar se monitorimi i vazhdueshëm i përputhshmërisë me “acquis”-in europian dhe standardet e BE-së do të jetë pjesë e pandashme e negociatave.
Kjo konferencë vjen pas hapjes së mëparshme të kapitujve të “Themeloreve”, “Marrëdhënieve të Jashtme” dhe “Tregut të Brendshëm”, si pjesë e procesit të negociatave të anëtarësimit, të cilat u zhvilluan gjatë 2024 dhe 2025.
Në një njoftim për shtyp të Këshillit të Bashkimit Europian theksohet se procesi i negociatave do të vazhdojë me ritme të qëndrueshme dhe se konferenca do të rikthehet për të shqyrtuar progresin në këtë grup-kapitull në kohën e duhur.
Ky grup përfshin kapitujt e mëposhtëm negociues:
Kapitulli 10 – Transformimi digjital dhe media,
Kapitulli 16 – Taksimi,
Kapitulli 17 – Politika ekonomike dhe monetare,
Kapitulli 19 – Politika sociale dhe punësimi,
Kapitulli 20 – Politika e ndërmarrjeve dhe industrisë,
Kapitulli 25 – Shkenca dhe kërkimi,
Kapitulli 26 – Arsimi dhe kultura,
Kapitulli 29 – Bashkimi doganor