Pas operacionit të suksesshëm të evakuimit nga Izraeli, qeveria shqiptare ka ndërmarrë një tjetër ndërhyrje të ndjeshme për të garantuar sigurinë e shtetasve të saj, këtë herë në Iran, një vend me të cilin Shqipëria nuk ka marrëdhënie diplomatike.
Ministri për Evropën dhe Punët e Jashtme, Igli Hasani, në një intervistë për Top Channel, konfirmoi se pesë ditë më parë është realizuar me sukses evakuimi i një familjeje shqiptare nga territori iranian.
“Kemi ruajtur vëmendje të vazhdueshme për shtetasit tanë që ndodhen në vende të rrezikshme, përfshirë ato ku nuk kemi marrëdhënie diplomatike, si Irani. Përmes bashkëpunimit me vende fqinje dhe partnere, kemi mundësuar tërheqjen e një familjeje – dy prindër dhe tre fëmijë – të cilët tashmë ndodhen të sigurt në Shqipëri”, tha ministri Hasani.
Sipas tij, operacioni u krye nëpërmjet një koordinimi të ngushtë me rrjetin diplomatik të Shqipërisë, duke garantuar lëvizjen e sigurt të familjes drejt territorit shqiptar.