Në prag të Europe Day, European Union në Kosovë i ka ndarë çmimin “Evropiania e Vitit 2026” Shqipe Neziri Vela, në vlerësim të angazhimit të saj për barazinë gjinore, fuqizimin e grave dhe promovimin e qeverisjes së qëndrueshme në sektorin energjetik.
Sipas njoftimit të BE-së, Neziri Vela ka mbi dy dekada përvojë në fushën e energjisë, qeverisjes së mirë dhe luftës kundër korrupsionit. Ajo është bashkëthemeluese e organizatës Women in Energy and Mining, përmes së cilës ka mbështetur qindra studente dhe profesioniste të reja me programe mentorimi dhe trajnime profesionale.
Kontributi i saj konsiderohet i rëndësishëm në krijimin e një brezi të ri grash lidere në sektorë tradicionalisht të dominuar nga burrat, si dhe në afrimin e sektorit të energjisë në Kosovë me standardet e Bashkimit Evropian.
Në listën e të nominuarve për këtë çmim ishin edhe Avni Mustafa, Dejan Radivojeviq dhe Rozafa Basha.
Çmimi “Evropiani/a i/e Vitit” ndahet nga BE-ja për individë dhe organizata që promovojnë vlerat evropiane dhe kontribuojnë në zhvillimin demokratik të Kosovës. Përzgjedhja e fitueses u bë nga një panel i përbërë nga përfaqësues të shoqërisë civile dhe të prezencës së BE-së në Kosovë.