Altin Celami është ish-ushtaraku i arrestuar në Tiranë i dyshuar për furnizim me armë të grupeve kriminale. Sipas policisë 46-vjeçari përdorte taksinë e tij për të transportuar armë dhe municion luftarak, me qëllim shmangien e kontrolleve policore.
Gjatë kontrollit fizik, në automjet dhe në banesë, policia gjeti katër armë zjarri pistoletë, municion luftarak, lëndë narkotike të dyshuar kokainë dhe pjesë armësh, të cilat u sekuestruan si prova materiale së bashku me automjetin që përdorte për transport.
Hetimet paraprake tregojnë se armët do t’u shiteshin grupeve kriminale që merren me trafik droge dhe vrasje me pagesë.
Altin Celami nuk është një emër i panjohur për policinë.
Në tetor të vitit 2022, ai u arrestua së bashku me 14 persona të tjerë, si pjesë e një grupi kriminal që dyshohej për vrasje me pagesë, ku në dy raste porositës ishte Kasandër Noga, aktualisht i arrestuar në Belgjikë.
Sipas hetimeve të asaj kohe, një pjesë e armëve të përdorura nga ky grup siguroheshin pikërisht nga ish-ushtaraku Altin Celami.
Radar.al