VLORË– “Blutë” e Vlorës ka finalizuar operacionin policor të koduar “Fake Cash”, duke goditur një aktivitet të shpërndarjes së kartëmonedhave të falsifikuara. Gjatë operacionit, janë arrestuar dy shtetas dhe një tjetër është proceduar penalisht për përfshirje në këtë aktivitet kriminal.
Pas hekurave kanë përfunduar Jurgen Tërpo, 25 vjeç, dhe Bledar Sulko, 35 vjeç, të dy banues në qytete të ndryshme, ndërsa shtetasi T.K., 24 vjeç, banues në Vlorë, u procedua në gjendje të lirë. Hetimet tregojnë se këta individë, në bashkëpunim me njëri-tjetrin, shpërndanin euro të falsifikuara në qytetin e Vlorës. Shtetasi T.K. dyshohet se siguroi kartëmonedha false dhe i futi në treg përmes blerjeve në biznese të ndryshme.
Njoftimi i policisë:
DVP Vlorë/Finalizohet operacioni policor “Fake Cash”, goditet një rast i shpërndarjes së kartëmonedhave të falsifikuara.
Vihen në pranga 2 shtetas që siguronin euro të falsifikuara dhe procedohet penalisht 1 tjetër që i fuste në treg duke kryer blerje në biznese të ndryshme të qytetit.
Specialistët e Seksionit për Krimin Ekonomik e Financiar, në bashkëpunim me Seksionin për Mbështetjen Operacionale të Hetimit, në DVP Vlorë, finalizuan me sukses operacionin policor të koduar “Fake Cash”. Si rezultat, u arrestuan në flagrancë shtetasit:
Jurgen Tërpo, 25 vjeç, banues në Skrapar;
Bledar Sulko, 35 vjeç, banues në Përmet.
Si dhe u procedua në gjendje të lirë shtetasi T. K., 24 vjeç, banues në Vlorë.
Nga veprimet hetimore ka rezultuar se këta shtetas, në bashkëpunim me njëri-tjetrin, ushtronin aktivitet të kundërligjshëm të shpërndarjes së kartëmonedhave të falsifikuara në qytetin e Vlorës. Shtetasi T. K. dyshohet se siguronte kartëmonedha false nga dy të arrestuarit dhe më pas i fuste në treg duke i përdorur për blerje në biznese të ndryshme të zonës.
Gjatë operacionit u sekuestrua në cilësinë e provës materiale një shumë prej 2550 eurosh të dyshuara të falsifikuara, në prerje 50 dhe 100 euro. Nën drejtimin e Prokurorisë së Vlorës, vijojnë hetimet për identifikimin dhe kapjen e personave të tjerë të përfshirë në këtë veprimtari të paligjshme.
Materialet iu referuan Prokurorisë për veprime të mëtejshme./Radar.al