Denis Tafili, 41 vjeç, është personi që Policia dyshon se u përfshi në konfliktin e armatosur të ndodhur pasditen e së premtes në fshatin Shkallnur, në Durrës. Sipas autoriteteve, ai dyshohet se goditi me qytën e një pistolete 36-vjeçarin Edison Gjuzi, gjatë një sherri për motive të dobëta.
Pas ngjarjes, Tafili, së bashku me një person tjetër të identifikuar si G. M., 27 vjeç, u larguan nga vendi i ngjarjes me automjet dhe aktualisht vijojnë të jenë në kërkim nga Policia.
Denis Tafili nuk është një emër i panjohur për drejtësinë. Ai rezulton i shpallur në kërkim nga Prokuroria e Posaçme Kundër Korrupsionit dhe Krimit të Organizuar (SPAK), në kuadër të operacionit ndaj grupit kriminal “Troplini”. Sipas SPAK, ai dyshohet për përfshirje në trafik ndërkombëtar të lëndëve narkotike dhe pastrim të produkteve të veprës penale.
Sipas hetimeve të deritanishme, organizata kriminale “Troplini” dyshohet se ka qenë e angazhuar në trafikun e kokainës dhe aktivitete të tjera të krimit të organizuar, ndërsa ndaj disa personave janë caktuar masa sigurie dhe janë lëshuar urdhër-arreste.
Fakti që Tafili dyshohet se ishte i lirë në momentin e konfliktit në Shkallnur, pavarësisht se rezulton i shpallur në kërkim, pritet të jetë pjesë e verifikimeve të autoriteteve.
Ndërkohë, ngjarja ka marrë edhe një tjetër dimension, pasi në konflikt dyshohet të ketë qenë i përfshirë edhe një punonjës policie jashtë shërbimit. Inspektori L. Xh. është shoqëruar, ndërsa ndaj tij po kryhen veprimet procedurale nga Agjencia e Mbikëqyrjes Policore (AMP).
Grupi hetimor, nën drejtimin e Prokurorisë, vijon hetimet për të zbardhur plotësisht rrethanat e konfliktit dhe për të dokumentuar ligjërisht përgjegjësitë e secilit prej të përfshirëve.