Këngëtari i njohur nga Maqedonia e Veriut, Shpat Kasapi, i cili u nda nga jeta më 26 nëntor 2025, do të përcillet sot për në banesën e fundit në Tetovë.
Familja e artistit ka konfirmuar lajmin e trishtë dhe ka bërë publike detajet e ceremonisë mortore. Homazhet do të zhvillohen nga ora 12:00, në Pallatin e Kulturës në Tetovë, ndërsa varrimi do të mbahet në orën 14:00, në varrezat e qytetit.
Në njoftimin e familjes, dhimbja dhe tronditja janë të pranishme në çdo rresht:
“Me hidhërim të thellë kumtojmë ndarjen nga jeta të birit, bashkëshortit, babait, vëllait dhe mikut tonë të dashur. Shpati ishte një zemër e pastër, një shpirt i gëzueshëm që jetonte me këngë në buzë dhe me dritë në sy. Ai përhapte vetëm dashuri e mirësi, dhe kushdo që e njihte, e ndiente ngrohtësinë e tij. Largimi i tij i papritur na ka thyer zemrat. Do të na mungojë zëri i butë, buzëqeshja e sinqertë dhe prania e tij qetësuese. Kujtimi i tij do të mbetet i paharruar për ne.”
Familja ka ftuar të gjithë miqtë, dashamirësit dhe publikun që e ka ndjekur gjatë karrierës së tij artistike, të marrin pjesë në ceremoninë e sotme për t’i dhënë lamtumirën e fundit një prej zërave më të dashur të muzikës shqiptare.