Një aksident tragjik ka ndodhur mëngjesin e sotëm në Elbasan, ku një pasagjer 21-vjeçar humbi jetën pasi automjeti me të cilin udhëtonte u përplas me një pemë anësore.
Uniformat blu bëjnë me dije se drejtuesi i mjetit, shtetasi R. R., 26 vjeç, u arrestua në flagrancë pasi drejtonte automjetin në gjendje të dehur dhe humbi kontrollin e tij.
Sipas njoftimit të Policisë:
“Specialistët e Qarkullimit Rrugor arrestuan në flagrancë shtetasin R. R., 26 vjeç, banues në Elbasan, pasi mëngjesin e sotëm, në rrugën ‘Janaq Kilica’, automjeti që ai drejtonte, në gjendje të dehur, ka dalë nga rruga dhe është përplasur me një pemë anësore. Si pasojë e aksidentit, ka humbur jetën pasagjeri në këtë automjet, shtetasi N. U., 21 vjeç, banues në Elbasan, ndërsa drejtuesi i mjetit ndodhet jashtë rrezikut për jetën.”
R. R. po përballet me procedime penale për drejtim të automjetit në gjendje të dehur dhe shkaktim të aksidentit me fatalitet, ndërsa hetimet për zbardhjen e plotë të rrethanave vijojnë.