TIRANË– Është publikuar manuali i rregullave etike me 14 këshilla për 45 policët në kampin e emigrantëve në Gjadër, pasi do të jenë në miniburgun me kapacitet maksimal 20 të burgosur, i ndërtuar pranë qendrave të riatdhesimit.
Në manual shpjegohet se shqiptarët janë popull modest, prandaj lakuriqësia në publik nuk është e mirëpritur. Më tej thuhet se duhet të shmangin me patjetër shoqërimin me femrat shqiptare pasi burri që e njeh ose e sheh gruan e tij duke u ballafaquar nga një burrë tjetër, mund të reagojë keq.
Gjithashtu një rregull tjetër është edhe qëndrimi në bare, ku ju bëhet me dije policëve se kafeja nuk konsumohet në banak, por vetëm ulur, duke shpjeguar se kjo është një traditë absolute e cila duhet respektuar.
Tjetër rregull që shënohet në këtë manual, është edhe gjuha që policët do të përdorin. “Kini vëmendjen për mënyrën sesi flisni sepse pothuajse të gjithë shqiptarët dinë italisht.”- është shkruar në manual.
Rregullat:
-Shmangni shoqërimin me femrat shqiptare, kujdes veshjen, lakuriqësia në publik nuk është e mirëpritur.
-Është një shoqëri më konservatore, sidomos në veri të vendit. Burri që e njeh ose e sheh gruan e tij duke u ballafaquar nga një burrë tjetër, mund të reagojë keq.
-Nuk u pëlqen të nënvlerësohen dhe se kafeja nuk konsumohet në banak, por vetëm ulur, kjo është një traditë absolute e cila duhet respektuar.
-Në restorante, përmbajuni asaj që është vendosur në menu, kërkesat për ndryshime në formimin e menusë nuk janë të mirëseardhura dhe çojnë në gabime dhe keqkuptime.
-Rekomandohet të sillni produkte dezinfektuese sepse zona e Gjaderit është shumë e infektuar me insekte dhe mushkonja.
-Flisni italisht, pothuajse të gjithë shqiptarët e dinë mire.
Megjithatë ky manual ka sjellë edhe pakënaqësi, pasi sekretari i sindikatës së policisë së burgjeve Uilpa, Gennarino De Fazio është shprehur se fillimisht kanë menduar se ishte një lajm i rremë, më pas është konfirmuar se ekziston në të vërtetë.
“Ne menduam se ishte lajm i rremë, pastaj mësuam se në fakt ai manual ishte hartuar dhe shpërndarë. Ne nuk besojmë se po tregohemi qëllimisht seksistë, intolerantë ose le të themi “anti-etnik “. Kjo ndoshta është punë e ndonjë zyrtari, por ajo që është për t’u habitur është se e gjithë kjo mund të menaxhohet në mënyrë të jashtëzakonshme dhe pa kontrollin paraprak të drejtuesve të Dapit (departamenti i burgjeve të Ministrisë së Drejtësisë).”- ka thënë ai.
Nga ana e opozitës Filiberto Zaratti, kreu i grupit të Aleancës së Gjelbër dhe të Majtë në Komisionin e Çështjeve Kushtetuese, deklaroi se këto janë çmenduri.
“Çmendurisë represive përtej kufirit, Palazzo Chigi shton mungesën totale të ndjenjës së qesharakut me aludime të racizmit kulturor. Ata nuk mund të kishin bërë më keq.”- ka thënë ai.
Theksojmë se kampi i emigrantëve në Shqipëri është pjesë e marrëveshjes së nënshkruar nga Giorgia Meloni dhe kryeministri shqiptar Edi Rama.
