Superylli i muzikës pop, Taylor Swift, është bërë muzikantja më e pasur në histori, sipas vlerësimeve të revistës Forbes, e cila e llogarit pasurinë e saj në rreth 2 miliardë dollarë.
Sipas Forbes, pasuria e artistes është dyfishuar krahasuar me vitin 2024, duke e vendosur atë në krye të listës së muzikantëve më të pasur në botë. Revista e cilëson Swift si një nga kompozitoret më të suksesshme komerciale të të gjitha kohërave.
Statusin e miliarderes, këngëtarja e arriti falë suksesit të jashtëzakonshëm të turneut “Eras”, i cili sipas Forbes është bërë turneu koncertal me fitimet më të larta në histori, duke gjeneruar rreth 2.2 miliardë dollarë të ardhura.
Një nga momentet kyçe në karrierën e saj erdhi në vitin 2020, kur Swift vendosi të riregjistrojë pjesën më të madhe të katalogut të saj muzikor. Ky vendim i lejoi asaj të rifitonte kontrollin mbi veprat e saj dhe të përfitonte drejtpërdrejt nga të ardhurat e licencimit.
Konflikti për të drejtat e albumeve të saj të para nisi pasi kompania Big Machine, me të cilën kishte nënshkruar në fillimet e karrierës, shiti regjistrimet master te kompania e lidhur me ish-menaxherin e muzikës Scooter Braun. Swift kundërshtoi publikisht marrëveshjen, duke deklaruar se nuk ishte konsultuar për shitjen.
Më pas, të drejtat kaluan te firma investuese Shamrock Capital, ndërsa në vitin 2025 artistja njoftoi se kishte arritur t’i blinte dhe të rimerrte kontrollin mbi gjashtë albumet e saj të para.
Forbes thekson se vlerësimet e pasurisë bazohen në të dhëna publike që përfshijnë të ardhurat, investimet, pronat dhe asetet e tjera të njohura, duke e bërë Taylor Swift një nga figurat më të suksesshme financiarisht në industrinë globale të argëtimit.