Autoritetet spanjolle kanë goditur një organizatë kriminale shqiptare në provincën e Valencias, e përfshirë në kultivimin dhe shpërndarjen në shkallë të gjerë të marijuanës. Operacioni u zhvillua nga Guardia Civil dhe njësitë antidrogë, duke çuar në arrestimin e tetë personave, mes tyre një grua, të moshës nga 19 deri në 38 vjeç.
Të arrestuarit akuzohen për pjesëmarrje në organizatë kriminale, trafik droge dhe mashtrim me energjinë elektrike. Gjatë hetimeve u ndalua edhe një shtetas polak, i cili kishte blerë mbi 12 kilogramë filiza marijuane nga rrjeti, me dyshimin për shpërndarje të mëtejshme.
Policia kontrolloi gjashtë prona në zona të ndryshme të Valencias, ku zbuloi dhe çmontoi tre plantacione kanabisi. Në total u sekuestruan 1,075 bimë në faza të ndryshme rritjeje, 33 kilogramë marijuanë të përpunuar, si dhe pajisje të shumta për kultivim dhe përgatitje për treg.
Hetimet nisën në qershor 2025, pasi u identifikuan dy shtetas shqiptarë të dyshuar për aktivitet kriminal. Gjatë operacionit u zbulua se grupi përdorte prona të marra me qira në zona të izoluara, ku instalonin teknologji të avancuar për rritjen e bimëve dhe shmangien e zbulimit.
Rrjeti përdorte dokumente të falsifikuara dhe persona të tretë për kontrata qiraje dhe furnizimi, duke e bërë më të vështirë identifikimin e tyre. Gjithashtu, anëtarët ndërronin shpesh automjetet dhe shmangnin kontaktet e drejtpërdrejta me plantacionet, duke i vizituar ato vetëm herë pas here.
Organizata rekrutonte persona nga Shqipëria për t’u kujdesur për plantacionet dhe për t’i ruajtur ato. Operacioni përfshiu disa faza bastisjesh gjatë vitit 2025 dhe fillimit të 2026, duke çuar në zbulimin e plotë të aktivitetit dhe arrestimin e drejtuesve kryesorë.
Të arrestuarit janë paraqitur para drejtësisë dhe katër prej tyre janë lënë në paraburgim, ndërsa hetimet vijojnë për zbardhjen e plotë të rrjetit kriminal.