TIRANË– Agjencia e Mbikëqyrjes Policore, Rajoni Durrës-Kavajë ka njoftuar se ka arrestuar në flagrancë punonjësin e policisë që akuzohet për aksidentin e rëndë me pasojë vdekjen në aksin Nikël-Larushk të Krujës në orët e para të mëngjesit.
I ndaluari është E. B., me detyrë Trupë shërbimi, Patrullë e Përgjithshme, pranë Komisariatit të Policisë Krujë, i dyshuar për kryerjen e veprës penale “shkelja e rregullave të qarkullimit rrugor” parashikuar nga neni 290 i Kodit Penal.
“Arrestimi i tij u krye pasi ditën e sotme rreth orës 05:45, duke drejtuar mjetin e tij në aksin Nikël-Larushkë, është përfshirë në një aksident rrugor, ku si pasojë ka ndërruar jetë në vendin e ngjarjes shtetasja N. Ç.”– bëri me dije AMP.
Materialet proceduriale u referuan në Prokurorinë Pranë Gjykatës së Shkallës së Parë të Juridiskionit të Përgjithshëm Tiranë, për të zbardhur dinamikën dhe shkaqet e aksidentit, teksa janë edhe në pritje të ekspertimit autoteknik./Radar.al