Situata e zjarreve në territorin e bashkisë Gramsh është vënë nën kontroll. Të gjitha vatrat e zjarrit janë fikur dhe banorët kanë nisur të kthehen në banesat e tyre, pas ditësh të tëra ankthi dhe evakuimesh të detyruara.
Autoritetet e emergjencave civile theksojnë se, pavarësisht shuarjes së flakëve, rreziku i riaktivizimit mbetet prezent, sidomos për shkak të erërave dhe temperaturave të larta. Për këtë arsye, rojet e pyllit, zjarrfikësit dhe vullnetarët vijojnë të jenë të shpërndarë në terren, të gatshëm për të ndërhyrë menjëherë në rast të ndonjë shpërthimi të ri të zjarrit.
Ndërkohë, po zhvillohen punime intensive për rikthimin e furnizimit me energji elektrike dhe ujë në zonat e prekura, për të normalizuar sa më shpejt jetën e përditshme të banorëve. Autoritetet u bëjnë apel qytetarëve të tregojnë kujdes të shtuar dhe të raportojnë menjëherë çdo shenjë tymi apo flake.
Radar.al