Shitjet e pasurive të paluajtshme kanë njohur rritje të ndjeshme gjatë tremujorit të dytë të vitit 2025. Sipas raportit të Institutit të Statistikave (INSTAT), indeksi i shitjeve në aktivitetin e pasurive të paluajtshme u rrit me 11,1% krahasuar me të njëjtën periudhë të vitit 2024.
Eksperti i pasurive të paluajtshme, Reinaldo Pipiria, në një intervistë për mediat, tha se rritja më e lartë është regjistruar në zonat bregdetare, ku kërkesa vjen kryesisht nga blerës të huaj, përfshirë shqiptarë të diasporës dhe qytetarë të huaj.
“Statistikat tregojnë se zonat bregdetare po performojnë më mirë dhe kërkesa është e qëndrueshme. Shumica e transaksioneve lidhen me banesa të reja, ndërsa stoku i pronave ekzistuese po kalon procesin e rivlerësimit,” tha Pipiria.
Sipas tij, 98% e të ardhurave nga tatimi mbi fitimin kapital vijnë nga tatimpagues të mëdhenj, kryesisht nga sektori i ndërtimit, duke treguar se po shiten kryesisht banesa të reja dhe më të shtrenjta.
Ndërkohë, qeveria ka përgatitur projektligjin e ri “Për rivlerësimin e pasurive të paluajtshme”, që parashikon uljen përkohshme të tatimit nga 15% në 5%. Projektligji pritet të shqyrtohet dhe miratohet nga parlamenti i ri.
Shoqata Kombëtare e Ndërmjetësve të Pasurive të Paluajtshme ka sugjeruar që afati i zbatimit të jetë 12 muaj dhe që për banesat të aplikohet një normë tatimi më e ulët, prej 3%, me qëllim lehtësimin e aksesit në strehim.