TIRANË– Efektivët e Policisë së Komisariatit Nr. 1. në Kryeqytet në kuadër të operacionit të koduar “Liqeni” kanë arrestuar në flagrancë dy shtetas.
Bëhet me dije se janë sekuestruar dozat me kanabis, gati për shitje, dhe shuma parash të përfituara nga ky aktivitet kriminal.
Dy personat e arrestuar janë, M. O., 27 vjeç, dhe K. S., 20 vjeç, të dy banues në Tiranë. Nga veprimet hetimore ka rezultuar se shtetasi K. S., pasi siguronte lëndë narkotike kanabis, e shiste atë në zonën e Parkut të Liqenit Artificial të Tiranës.
Ndryshe nga raste të ngjashme për shitjen e lëndëve narkotike, në këtë ngjarje është vënë re paketim i vençantë që të rinjtë kishin zgjedhur. Janë pako me imazhe femrash të zhveshura.
NJOFTIMI I POILICISË:
Tiranë/Finalizohet operacioni policor i koduar “Liqeni”, për goditjen e veprimtarisë kriminale të shpërndarjes së lëndëve narkotike.
Operacioni u zhvillua nga Komisariati i Policisë Nr. 1.
Arrestohen në flagrancë dy shtetas.
Sekuestrohen dozat me kanabis, gati për shitje, dhe shuma parash të përfituara nga ky aktivitet kriminal.
Shërbimet e Komisariatit të Policisë Nr. 1, në vijim të punës për goditjen e veprimtarive kriminale në fushën e narkotikëve, bazuar dhe në informacionet e siguruara përmes inteligjencës informative, për një rast të shpërndarjes së lëndëve narkotike në zonën e Parkut të Liqenit Artificial të Tiranës, kanë organizuar dhe finalizuar operacionin policor të koduar “Liqeni”.
Si rezultat i këtij operacioni u arrestuan shtetasit M. O., 27 vjeç, dhe K. S., 20 vjeç, të dy banues në Tiranë.
Shërbimet e Komisariatit Nr. 1, kanë lokalizuar dhe ndaluar shtetasin M. O., të cilit gjatë kontrollit fizik, i kanë gjetur doza me lëndë të dyshuar narkotike kanabis, dhe nga verifikimet e kryera ka rezultuar se këto doza i kishte siguruar nga shtetasi K. S. Nga veprimet hetimore ka rezultuar se shtetasi K. S., pasi siguronte lëndë narkotike kanabis, e shiste atë në zonën e Parkut të Liqenit Artificial të Tiranës.
Në cilësinë e provës materiale u sekuestrua lënda narkotike dhe shuma parash të përfituara nga shitja e lëndës narkotike.